Rechters 03
12 Weer deden Isrelieten nait zo as de HEER dat wol. Doarom zette de HEER keunenk Eglon van Moäb der tou aan om t tegen Israël op te nemen. Ze deden ja wat verkeerd was in de HEER zien ogen.
13 Eglon wos ook mit Ammonieten en Amalekieten in ain joar te kommen. Mitnkander trokken ze tegen Israël op. Ze kregen hom der onder en nammen paalmstad Jericho in.
14 Zo zatten Isrelieten achtien joar onder keunenk Eglon van Moäb.
15 Dou raipen ze de HEER om hulp en de HEER stuurde ain om heur te bevrijden: Ehud, n zeun van Gera, oet stam Benjamin. Man was links. Isrelieten stuurden dij Ehud ter op oet om lasten òf te droagen aan keunenk Eglon van Moäb.
16 Ehud luit zok n kòrt sweerd moaken, schaarp aan baaide kanten. Dij hong e aan rechterzied, aan n raim onder zien klaaier.
17 Zo brochde hai sinzen noar keunenk Eglon van Moäb. Nou was dij Eglon n dikke, vadsege kerel.
18 Dou Ehud kloar was mit t aanbaiden van sinzen, stuurde hai t volk vot, dij boudel droagen haar.
19 Zulm keerde hai weerom bie stainen beelden bie Gilgal in de buurt. Hai luit zok bie keunenk aandainen. "Keunenk," zee e, "k heb joe nog wat te vertellen. Gainain mag t waiten." "Stil!" raip keunenk. En ale knechten vot.
20 Ehud kwam op keunenk tou. Dij zat allenneg in n luchtege koamer boven. "k Heb n bosschop van God veur joe," zee Ehud. Keunenk kwam in t èn van zien troon.
21 Dou greep Ehud mit linkerhaand t sweerd van rechterzied en stook hom Eglon in t lief.
22 Mit handvat en aal ging t sweerd ter in, t vet kwaabde der haildaal omtou, want Ehud trok t sweerd der nait weer oet. Dou verswon e deur achterdeur.
23 Over omloop ging e noar boeten tou. Deuren van zoal trok e achter zok dicht, grondel der op.
24 Hai was ter net oet - dou wollen keunenk zien knechten der in. Ze zagen dat deuren van bovenzoal op slöt zatten. "Keunenk zit zeker op toezie," zeden ze tegen nkander.
25 En zai mor wachten! Mor op t lest werden ze der kant mit verlegen: hai dee deuren van zoal ja mor aal nait open. Dou gingen ze sleudel hoalen en deden deur lös van boetenkaant òf, en verachtjont, doar lag heur heer, dood op deel.
26 In tied dat zai doar aal mor stonden te wachten, was Ehud mooi oetknepen. Hai was stainen beelden al laank verbie en zat vaaileg en wel in Seïr.
27 Nog mor naauw in t baarglaand van Efraïm luit e ramshoorn bloazen. Dou kwammen Isrelieten tou baargen oet - hai aan kop.
28 "Mie achternoa," zee e. "Want de HEER het joen vijanden, Moäbieten, aan joe oetleverd." Zai trokken mit hom omdeel en bezetten oversteekploatsen in Jordaan. Gain Moäbiet kon der meer langs.
29 Ze versluigen doudestieds om en bie tiendoezend Moäbieten. Altmoal grode en staarke kerels, gainain ontkwam.
30 Dij dag mos Moäb nek boegen veur Israël. t Laand haar dou tachteg joar vree.
|